Executive Order No. 3, Series of 2025
𝗣𝗔𝗚𝗦𝗨𝗦𝗣𝗘𝗡𝗦𝗢 𝗦𝗔 𝗧𝗔𝗡𝗔𝗡 𝗞𝗢𝗠𝗘𝗥𝗦𝗬𝗔𝗟 𝗨𝗚 𝗜𝗡𝗗𝗨𝗦𝗧𝗥𝗜𝗬𝗔𝗟 𝗡𝗚𝗔 𝗣𝗘𝗥𝗠𝗜𝗧 𝗦𝗔 𝗣𝗔𝗚𝗞𝗨𝗛𝗔 𝗢𝗚 𝗕𝗔𝗟𝗔𝗦 𝗨𝗚 𝗚𝗥𝗔𝗕𝗔 𝗦𝗔 𝗣𝗥𝗢𝗕𝗜𝗡𝗦𝗬𝗔
DIPOLOG CITY (Hulyo 4, 2025) — Usa ka mando ang gipagawas nga temporaryo nga nagpahunong sa operasyon sa tanan nga komersyal ug industriyal nga permit sa pagkolekta og balas, graba, bato (𝘱𝘦𝘣𝘣𝘭𝘦𝘴) sa tibuok probinsya sa Zamboanga del Norte.
Ang mando nagtugot usab sa Provincial Environmental Management Office (PEMO) nga mosusi sa mga lugar nga adunay permit ug mga ‘𝘴𝘵𝘰𝘤𝘬𝘺𝘢𝘳𝘥’, ug paghimo og ‘𝘢𝘴𝘴𝘦𝘴𝘴𝘮𝘦𝘯𝘵’ ug imbentaryo sa tanang nakuha nga balas, graba ug uban pang minerales.
Gisugo sab ang PEMO nga makigkoordinar sa Department of Environment and Natural Resources (DENR), Environmental Management Bureau (EMB), Mines and Geosciences Bureau (MGB), ug uban pang angay nga ahensya sa gobyerno aron imbestigahan ang epekto sa tanang quarry ug mining operations sa probinsya.
Ang maong lakang gituohan nga usa ka paagi aron matan-aw pag-ayo ang kahimtang sa palibot ug malikayan ang mas grabe nga kadaot nga miresulta sa walay kontrol nga pagmina ug pagkutkot sa mga minerales.
Kini usab usa ka paningkamot sa lokal nga panggamhanan aron mapreserbar ang kinaiyahan ug mapadayon ang malungtarong kalamboan sa probinsya.
Wala pa maghatag og petsa kung kanus-a tangtangon ang suspensyon, apan gikatakda nga magsugod dayon ang inspeksyon ug imbentaryo aron dayon masuta ang kahimtang sa matag operasyon.
Ang komunidad ug mga ‘𝘦𝘯𝘷𝘪𝘳𝘰𝘯𝘮𝘦𝘯𝘵𝘢𝘭 𝘨𝘳𝘰𝘶𝘱𝘴’ mipadayag sa ilang suporta sa maong lakang ug naglaum nga kini mahimong sinugdanan sa mas estriktong regulasyon ug mas responsableng pagkuha-kutkot ug ‘𝘮𝘪𝘯𝘪𝘯𝘨 𝘰𝘱𝘦𝘳𝘢𝘵𝘪𝘰𝘯𝘴’ sa tibook probinsya. (ᴘɪᴄ-ꜱʙᴀ)
#GovDarelUy#KuyogTa#BagongZanorte
https://www.facebook.com/zninfocenter/posts/1322959036504158
